Arquivo por autores: Castor e Felix Castro

Acerca de Castor e Felix Castro

Músicos e investigadores en patrimonio musical e etnográfico galego

Gala Arenteira 2022. Auditorio Manuel María Carballiño, 25/XI

Hoxe venres 25/XI ás 20:30 h TOR estaremos no Auditorio Manuel María do Carballiño colaborando musicalmente xunto co Coro de Cámara Música Viva, na XI Edición do Galardón A Arenteira.

Como en anos anteriores, o obxecto de este acto e facer recoñecemento dos valores de persoas destacadas da comarca do Ribeiro e máis do Carballiño nos ámbitos da cultura, do deporte e a título póstumo, ademáis este ano estrease o galardón destinado a superación.

Este ano os galardoados serán:
Cultura, Don Eduardo Bernárdez.
Deporte, Clube Baloncesto Maside.
Póstumo, Dona María Teresa Miras Portugal.
Superación, Dona Jennifer Manzano Montoya.
www.galardonarenteira.gal

O acto será ademáis reproducido en directo por internet por Badal Novas a través da súa Canle de Facebook

https://www.facebook.com/novasbadal/

www.badalnovas.com

Moitas gracias á organización e ao grupo CerBer por contar novamente con nós!

Rodaxe de «Luarada», primeiras imaxes

Con ista claqueta comezaba a pasada semana a rodaxe de «Luarada», filme de Zinemusik dirixido por Oscar Doviso, sobre Manuel Blanco Romasanta, o coñecido Lobisome de Esgos.

Conta cun formidable traballo de guionistas, dirección, interpretacións, e unha coidadísima ambientación e vestiario que xa se aprecia dende estas primeiras imaxes da rodaxe.

Fotografía de Cris Andina

Nós participamos co asesoramiento nos aspectos relativos á causa xudicial seguida contra Manuel Blanco Romasanta. As dúbidas que sempre se suscitan sobre os feitos, obrigan a revisar datas, personaxes que interveñen e demais, e xa trouxeron novidades que iremos desvelando nos vindeiros meses.

Lonxe de ser un caso pechado, quedan moitos bimbios que trenzar para pechar iste cesto.

Se queredes estar ao día da marcha do proxecto, non deixedes de visitar de cando en vez https://www.facebook.com/luaradafilme/

Edición de El Libro de San Cipriano y Santa Justina

Acabamos de recibir as probas de impresión a cor de “El Libro de San Cipriano y Santa Justina” que publicamos en Amazon fai quince días.

Con el iniciamos a colección Scrinium Mira Librorum Gabinete dos Libros Maravillosos, e difundiremos exemplares raros da nosa colección. Todos eles serán publicados en formato electrónico, tapa blanda a toda cor, e tapa blanda en blanco e negro.

Estamos moi satisfeitos cos resultados da publicación. Tivemos especial coidado en que a proporción do escaneado e a reprodución das páxinas no libro impreso se corresponderan co exemplar orixinal para asemellar o máis posible a experiencia lectora.

Aquí podedes ver unhas fotografías man a man do orixinal e a copia do libro. Esperamos que vos guste.

dav
dav
dav

Estrea da obra «Transformacións» de Dorothé Schubarth en Santiago de Compostela

O vindeiro martes 10 de marzo ás 20 h terá lugar no Paraninfo da Universidade de Santiago de Compostela un acto irrepetible como é a estrea absoluta da composición para cuarteto de corda clarinete e percusión «Transformacións» de Dorothé Schubarth, na que será un grandísimo pracer colaborar.

Deixámovos o tríptico de presentación e transcribimos as palabras da súa autora de sobre o evento:

Despois de ter acabada a peza Transformacións desexei que se tocase e que se puidese oír. Síntome feliz e agradecida de que agora poidamos escoitalas e de poder comunicarme con vós, que viñestes aquí grazas ós músicos que se prestaron: o cuarteto Alicerce, ó cal se xuntan Alberto Aneiros co clarinete e Marcos Mato Collazo, coa percusión.

Pero tiven máis sorte aínda: varios amigos axudáronme crear unha forma arredor da peza. Lucía Cedrón e Carlos Rafael vannos recitar unhas poesías. É unha forma de dialogar, de conversar música e texto. E á súa vez as poesías están envoltas en pezas para frautas e zanfoña que nos tocan Cástor Castro e Germán Díaz. Grazas daquela a eles pola axuda que me prestaron. E entre as poesías hai dúas da miña amiga Ana María Fernández, grazas tamén a ela. E iso non é todo: por detrás están Antón Santamarina e Concha Losada con consellos e axuda.

Quero deixar constancia tamén do meu agradecemento á Universidade de Santiago por terme cedido este emblemático auditorio. Sodes moitos os que me axudastes realizar este acto de música e poesía. Grazas a todos.

Transformacións é unha peza curta, sinxela. E como tódalas músicas esvaece en seguida despois de ser tocada e só queda o pouco que gardamos na memoria. Por iso pensei que se debía executar dúas veces, e ademais quería darlle un acompañamento con poesía e música para frauta e zanfona. Textos e melodías entran en conversación coas Transformacións. E as melodías e fragmentos de melodías en transformación comunícanse entre si.

Espero que a peza se explique por si mesma, pero adianto unhas palabras:

Ao principio o clarinete tócanos unha cántiga

Despois entra o cuarteto e conversan entre si os distintos instrumentos e en contraste co clarinete

As contestacións empezan a superpoñerse e… esgótanse

Neste momento entra a percusión cun ritmo ben coñecido e o cuarteto suxéitase á el coas súas melodías.

O ritmo, e con el o compás, transfórmase case inaudiblemente, e con el transfórmase a melodía que toca o cuarteto.

-Cara ó final guía o clarinete con aires que contrastan coas melodías do cuarteto.

Queda por mencionar que a percusión ten unha 2ª voz: esta expresa en certos momentos claves o silencio, fenómeno tan importante na música.

Dorothé Schubarth

Basel, Suíza, 2020

Participan Carlos Rafael, Lucía Cedrón, o Cuarteto Alicerce, Alberto Aneiros, Marcos Mato, Germán Díaz e Cástor Castro.

Frauta traveseira de Re na Galiza. Recursos

Publicamos aquí diversos recursos que empreguei na charla «A frauta traveseira de Re en Galicia. Gravacións de campo» nas II Xornadas da Requinta o 9 de Xaneiro de 2019, organizada pola Asociación de Gaiteiros Galegos.

Un resumo da charla, centrado especialmente nas entrevistas a diversos frauteiros aparece na revista da A.G.G. 2020, polo que poremos aquí os seguintes recursos complementarios:

-Artigo sobre a Frauta na Galiza

 «A frauta na Caliza. Referencias literarias e xornalísticas no s. XIX. O seu emprego en manifestacións musicais de carácter social: Fiadeiros, ruadas, festas de canto e pandeireta» en Murguía Revista Galega de Historia (Santiago de Compostela: Colectivo Murguía-AGH, 2004), no que resumín as referencias atopadas ata entón.

-Audios Soundcloud (pendientes de completar)

Eí ven o Urco!

Pontevedra, 1876

Estas noites de inverno que se nos ten metido o urco nas nosas casas a través da xanela dos nosos televisores,  non estaría de máis lembrar quen é o urco, un animal mitolóxico galego con forma de xigante can negro con cornos, que sae do mar encadeado, botando lume e cos ollos alumeando como faíscas acesas. Agoiro da morte e a mala sorte, escóitaselle ouvear polas noites polos montes o corredoiras.

No ano 1876 no antroido de Pontevedra faría o urco a súa aparición en forma de persoa disfrazada con peles e cadenas e unha carauta de animal. Daquela publicáronse  toda unha sorte de panfletos arredor deste personaxe, que se ben nun principio concordaba na figura do ser mitolóxico, logo resultou ser un rei que coa súa comitiva chegaba á capital pontevedresa e loitaba con Teucro, caendo ao final derrotado.

Nós quedarémonos coa primeira figura, máis arrepiante, mais próxima á tradición e á ficción da serie que se está a emitir: un Urco con máscara de madeira, cuberto de peles e encadeado, rodeado de xente para controlar a súa ferocidade.

Temos un prego de cordel dese ano, 1876, publicado en Pontevedra, na imprenta de Verea y Quintana, titulado “Premática de los aparatos é guisa en que rescebirse ha el urco en esta ciudad”, onde conta os agasallos que se lle farían ao Urco nos días 27, 28 de febreiro, e 1 de marzo de 1876.

Chama a atención no texto que se demanda compostura para que non se faga o que «ovo antaño de facer rieptos e inxuria a las máscaras», e quen o faga será considerado «felón e malnascido».

A figura do urco amosada no primeiro capítulo ten moita semellanza co Oso de Salcedo (Pobra de Brollón) que sae nesta parroquia luguesa rodeado dos seus criados o luns de entroido para asustar aos veciños. Esta máscara, de gran antigüidade, ten paralelismos  noutras zonas de España e Europa, simbolizando o fin do inverno e comezo da primavera, que é cando saen os osos das súas covas, e o comezo do novo ciclo do ano, que sempre foi o que simbolizou o entroido.

Chama atención  tamén na serie, o de poñer unha celebración de entroido como denominada mércores de fariñada, que non ten moito sentido no entroido tradicional, xa que o único mércores sinalado tradicionalmente é o de cinza, como momento da súa finalización; sendo os días celebrados, os domingos anteriores ao entroido e posterior de piñata, os xoves de compadres e  de comadres, e logo os sábado, domingo, luns e martes propiamente de entroido.  Sendo nomeados con adxectivos (corredoiro, fareleiro, oleiro, etc. nomes que varía segundo as zonas).

Se na illa de Néboa tiveran recibido según merecía ao Urco, como fixeron no ano 1876 en Pontevedra, de seguro que non habería tanto desmán e tería regresado ao Borrón satisfeito e cheo de fartura. Pero claro, entón  a serie xa non tería nada que contar.

Festa da Hamburguesa na Estación de Loman, Ourense

Mañá Xoves día 5 terá lugar a Festa de Hamburguesa-Desafío Loman, na nosa hamburguesería favorita, A Estación de Loman, a partir das 18:30 h da tarde

Tíñannos contratados para actuar, pero finalmente non podemos ofrecer o concerto.

En calquer caso, se tedes oportunidade de ir, coñeceredes as mellores hamburguesas da cidade ! 🙂